Դատափորձագիտական սարքավորումների արտադրման ոլորտում առաջատար Regula ընկերության ներկայացուցիչ Վլադիմիր Բուտուրլիան օրերս այցելել էր ԳԱԱ «Փորձաքննությունների ազգային բյուրո» ՊՈԱԿ՝ կազմակերպությունում ներդրված տվյալ ընկերության արտադրության սարքավորումային համալիրի գործնական կիրառության շրջանակների դիտարկման, հնարավորությունների ընդլայնմանն ուղղված հարցերի քննարկման և հետագա համագործակցության նոր հեռանկարների ձևավորման նպատակով:
Հարկ է նշել, որ «Փորձաքննությունների ազգային բյուրո» ՊՈԱԿ-ի կողմից նախորդ տարի նշված ընկերությունից ձեռք բերված «Regula 4307» մոդելի տեսապատկերային համեմատական սարքավորումային համալիրը վերջին սերնդի ծրագրային ապահովումներով ակտիվ կիրառվում է փաստաթղթաբանական և այլ բնագավառների փորձագիտական հետազոտությունների իրականացման գործընթացում՝ ապահովելով ընդգրկուն տվյալների բազաների տեղեկատվության հետ համեմատման արդյունքում հիմնավոր ապացույցների տրամադրում: 
Նշենք, որ Regula ընկերությունը համաշխարհային առաջատար կազմակերպություններից է, որը զբաղվում է նաև դատափորձագիտական ոլորտի սարքավորումների ստեղծմամբ, ինչպես նաև  նույնականացման նպատակով կիրառվող ծրագրային ապահովումների մշակմամբ:
Ձեռք բերված սարքավորումները կիրառվում են նաև գիտահետազոտական աշխատանքների իրականացման շրջանակներում՝ առավել առաջադեմ արդյունքների ապահովման նպատակով:
Հաշվի առնելով «Regula» ընկերությունից ձեռք բերված սարքավորումային համալիրի կիրառման և նոր հնարավորությունների ընդլայնման կարևորությունը, Բյուրոն հանձնառու է շարունակել ակտիվ փոխգործակցությունը ոլորտի սարքավորումային ապահովման գործում առաջադեմ արդյունքներ գրանցող ընկերությունների հետ:

«Փորձաքննությունների ազգային բյուրո» ՊՈԱԿ-ի և Բելառուսի Հանրապետության դատափորձագիտական պետական կոմիտեի գիտագործնական կենտրոնի միջև իրականացված համատեղ գիտահետազոտական աշխատանքների արդյունքում մշակվել  և հրատարակվել է դենդրոխրոնոլոգիական փորձաքննություններին առնչվող համատեղ բացատրական բառարան (ուղեցույց):
Տեղեկատու մեթոդական ուղեցույցում ընդգրկված են դենդրոխրոնոլոգիական հետազոտությունների բնագավառում հանդիպող հիմնական տերմինները:
Ուղեցույցի համահեղինակների թվում են Փորձաքննությունների ազգային բյուրոյի տնօրենի՝ գիտության գծով տեղակալ Պատվական Ոսկանյանը, Բյուրոյի հողագիտական և կենսաբանական փորձաքննությունների բաժնի պետ Աննա Պետրոսյանը, Բելառուսի դատափորձագիտական պետական կոմիտեի գիտագործնական կենտրոնի նյութերի և արտադրանքի փորձաքննությունների լաբորատորիայի ղեկավար Աննա Խոխը: 
Բառարանը կիրառելի է ինչպես դատափորձագիտական և դատաքննչական բնագավառներում, այնպես էլ ուսումնական գործընթացներում փորձագետների որակավորման բարձրացման նպատակով:

«Փորձաքննությունների ազգային բյուրո» ՊՈԱԿ-ի և Բելառուսի Հանրապետության դատափորձագիտական պետական կոմիտեի գիտագործնական կենտրոնի միջև համագործակցության պայմանագրի շրջանակներում իրականացված համատեղ գիտահետազոտական աշխատանքների արդյունքների հիման վրա համատեղ մշակվել և հրատարակվել է էկոլոգիական փորձաքննությունների բնագավառում կիրառվող մեթոդիկա, որը վերաբերում է հաշվարկման և վերլուծական մեթոդների կիրառմամբ շրջակա միջավայրի կամ դրա առանձին բաղադրիչների վրա մարդածին ազդեցության հանգամանքների պարզմանը: 
Մեթոդիկայի հեղինակներն են Փորձաքննությունների ազգային բյուրոյի տնօրենի՝ գիտության գծով տեղակալ, քիմիական գիտությունների թեկնածու, ավագ գիտաշխատող Պատվական Ոսկանյանը և Բելառուսի Հանրապետության դատափորձագիտական պետական կոմիտեի գիտագործնական կենտրոնի նյութերի և արտադրանքի փորձաքննությունների լաբորատորիայի ղեկավար Աննա Խոխը: 
Աշխատությունում  ներկայացված են ընդհանուր մեթոդական դրույթներ, էկոլոգիական փորձաքննության անցկացման ընթացակարգեր՝ գնահատելու հաշվարկման և վերլուծական մեթոդի կիրառմամբ շրջակա միջավայրի կամ դրա առանձին բաղադրիչների վրա մարդածին ազդեցությունը: 
Գործընթացն իրենից ներկայացնում է միմյանց փոխկապակցված ֆունկցիոնալ բլոկների հաջորդականություն, որոնցից յուրաքանչյուրն արտացոլում է փորձագետի կոնկրետ գործողության իրականացումը՝ ստացվող նյութերի տվյալներին ծանոթացումից մինչև ստացված արդյունքների գնահատում և եզրակացության կազմում: 
Մեթոդիկան կիրառելի է ինչպես դատափորձագիտական և դատաքննչական բնագավառներում, այնպես էլ ուսումնական գործընթացներում փորձագետների որակավորման բարձրացման նպատակով:

ՀՀ ԳԱԱ «Փորձաքննությունների ազգային բյուրո» ՊՈԱԿ-ի ներկայացուցիչները՝ տնօրենի տեղակալ Արամ Գահնապետյանի գլխավորությամբ հոկտեմբերի 15-ին հեռավար ձևաչափով մասնակցել են Ուկրաինայի արդարադատության նախարարության դատական փորձաքննությունների ինստիտուտի կազմակերպած «Դատական փորձաքննության և քրեագիտության արդի հիմնախնդիրները» թեմայով միջազգային գիտաժողովին, որը նվիրված էր Ուկրաինայի արդարադատության նախարարության մտավոր սեփականության հարցերով դատական փորձաքննությունների գիտահետազոտական կենտրոնի տնօրեն, ականավոր գիտնական Վլադիսլավ Ֆեդորենկոյի հիշատակին:
Միջոցառմանը մասնակցում էին դատափորձագիտական բնագավառի առաջատար փորձագետներ և գիտնականներ Հայաստանից, Ուկրաինայից, Իսրայելից, Հունգարիայից, Չեռնոգորիայից, Մոլդովայից և այլ երկրներից:
Գիտաժողովի բացմանը ողջույնի խոսքով և ելույթով հանդես եկավ նաև Փորձաքննությունների ազգային բյուրոյի տնօրենի տեղակալ Արամ Գահնապետյանը:
Խոսելով ուկրաինացի գործընկերոջ՝ երջանկահիշատակ Վլադիսլավ Ֆեդորենկոյի մասին, Բյուրոյի փոխտնօրենը ջերմությամբ հիշեց նրա հետ ունեցած մասնագիտական շփումների և արդյունավետ համագործակցության մասին:
«2019 թվականից ի վեր բացառիկ հնարավորություն ենք ունեցել համագործակցելու Վլադիսլավ Լեոնիդովիչի հետ՝ իսկական պրոֆեսիոնալի, ով տիրապետում էր մտավոր սեփականության արդյունքների գնահատման խորը գիտելիքների: Նշանակալի է նրա ավանդը փորձագիտական տվյալ բնագավառի փորձագիտական հնարավորությունների և գիտական մտքի շարունակական զարգացման և հիմնավոր արդյունքների ապահովման գործում: 
Նրա նախաձեռնության և ակտիվ մասնակցության շնորհիվ ստեղծվել է իր տեսակով յուրահատուկ հայ-ուկրաինական մեթոդական խումբ, ինչպես նաև մտավոր սեփականության օբյեկտների դատական փորձաքննությունների համար կիրառվող մեթոդական բառարան: Նշված գործընթացը  հնարավորություն ընձեռեց իրականացնել համատեղ գիտահետազոտական աշխատանքներ, ինչպես նաև փորձի փոխանակում՝ մտավոր սեփականության օբյեկտների փորձաքննությունների կարողությունների զարգացման նպատակով: Մեծ էր նաև Վլադիսլավ Լեոնիդովիչի ձգտումը մտավոր սեփականության օբյեկտների դատական փորձաքննության շրջանակներում գիտական հետազոտությունների և մեթոդաբանության մշակման զարգացման գործում»,-իր խոսքում նշեց Արամ Գահնապետյանը:
Անդրադառնալով Վլադիսլավ Ֆեդորենկոյի ղեկավարման ժամանակահատվածում Ուկրաինայի մտավոր սեփականության հարցերով դատական փորձաքննությունների գիտահետազոտական կենտրոնի և  ՀՀ ԳԱԱ «Փորձաքննությունների ազգային բյուրո» ՊՈԱԿ-ի միջև ձևավորված համագործակցությանը, Գահնապետյանը հիշեցրեց 2019թ. Բյուրոյի հիմնադրման 15-ամյակին նվիրված միջազգային գիտաժողովի շրջանակներում երկու երկրների փորձագիտական հաստատությունների միջև ստորագրված համագործակցության հուշագիրը՝ ապահովելով փոխգործակցության առավել բարձր մակարդակ:
Գիտաժողովի շրջանակներում «Մտավոր սեփականության օբյեկտների գնահատման առանձնահատկությունները կատարված փորձաքննությունների շրջանակներում» թեմայով համատեղ զեկույցով հանդես եկան Փորձաքննությունների ազգային բյուրոյի ապրանքագիտական փորձաքննությունների բաժնի փորձագետներ Աննա Հարությունյանը և Շուշանիկ Մովսիսյանը:
Անդրադառնալով Փորձաքննությունների ազգային բյուրոյի և Ուկրաինայի մտավոր սեփականության հարցերով դատական փորձաքննությունների գիտահետազոտական կենտրոնի միջև իրականացված համատեղ հետազոտություններին, Աննա Հարությունյանը նշեց, որ ստացված արդյունքների հիման վրա մշակվել են մի շարք մեթոդական մոտեցումներ, որոնք կիրառելի են նաև ՀՀ-ում իրականացվող ապրանքագիտական փորձաքննությունների բնագավառում: Մեթոդական մոտեցումները, որոնք ներկայացված են մտավոր սեփականության օբյեկտների արժեքի պարզման հիմնական տասը քայլերով, հիմք են հանդիսանում նմանատիպ փորձաքննությունների անցկացման համար՝ ապահովելով օբյեկիվ և լիարժեք փորձագիտական եզրակացություններ:
«Մտավոր սեփականության արդյունքներն, ընդհանուր առմամբ շատ յուրահատուկ են՝ կախված այն հանգամանքից, թե ո՞վ է հեղինակը, ի՞նչ հեղինակություն ունի, ի՞նչ իրավունքներով է պաշտպանված տվյալ մտավոր սեփականության արդյունքը, ե՞րբ է այն ստեղծվել, ի՞նչ նյութեր են օգտագործվել դրանց ստեղծման համար, ի՞նչ լրացուցիչ օգուտ կարելի է քաղել տվյալ մտավոր սեփականութան կիրառումից և այլն: Նշված հանգամանքների պարզումը չափազանց կարևոր է մտավոր սեփականության օբյեկտների արժեքի պարզման գործընթացում օբյեկտիվ և լիարժեք հետևությունների հանգելու համար»,-նշեց փորձագետը:
Փորձաքննությունների ազգային բյուրոն կարևորում է մասնակցությունը նմանօրինակ համաժողովներին՝ ի նպաստ միջազգային համագործակցության շրջանակների ընդլայնմանը, մեր երկրում դատափորձագիտական հնարավորությունների արդիականացմանն ու ոլորտի կայուն զարգացման ապահովմանը:

ՀՀ ԳԱԱ «Փորձաքննությունների ազգային բյուրո» ՊՈԱԿ-ում ընթանում են փորձաքննություններ նշանակելու և ելակետային տվյալների ձեռքբերման իրավասություն ունեցող աշխատակիցների դատափորձագիտական բնագավառում մասնագիտական որակավորման բարձրացման դասընթացները, որին ներգրավվել են ՀՀ քննչական կոմիտեի և ՀՀ հակակոռուպցիոն կոմիտեի աշխատակիցները: 
Դասընթացների ուսումնական ծրագրերն ընդգրկում են փորձաքննությունների առնվազն 23 տեսակներին, ինչպես նաև քրեաբանության արդի հիմնախնդիրներին և կիրառական նշանակությանն առնչվող ընդհանուր 7 տասնյակից ավելի թեմաներ։
Դասընթացների արդյունքում մասնակիցները ձեռք կբերեն գիտելիքներ քրեական դատավարության շրջանակներում փորձաքնությունների նշանակման, կատարման և արդյունքների գնահատման առանձնահատկությունների վերաբերյալ, կծանոթանան ամբողջական ելակետային տվյալներ ներկայացնելու, յուրաքանչյուր դեպքին համարժեք թիրախային և արժեքավոր ապացույցների ստացում ենթադրող հարցադրումների առաջադրման առանձնահատկություններին՝ կարևորելով ապացույցների հավաքման ու գնահատման ընթացքում հատուկ գիտելիքների կիրառումը։
Դասընթացի քննական թեստավորման փուլը հաջողությամբ հաղթահարած ՀՀ քննչական կոմիտեի և ՀՀ հակակոռուպցիոն կոմիտեի ինքնավար պաշտոն զբաղեցնող շուրջ չորս տասնյակ քննիչներ ընթացիկ տարում արդեն իսկ ստացել են համապատասխան վկայագրեր:
Նշված դասընթացների շարունակական իրականացումը նպատակ ունի նպաստել Հայաստանի Հանրապետությունում քրեական արդարադատություն իրականացնող մարմինների գործունեության արդյունավետության բարձրացմանը, ինչը կարևոր նշանակություն ունի հանցագործությունների քննության բարձր որակի բարձրացման և մեր երկրում օրենքի գերակայության ապահովման գործում:

ԳԱԱ «Փորձաքննությունների ազգային բյուրո» ՊՈԱԿ-ի ներկայացուցիչները՝ տնօրեն Արգամ Հովսեփյանի գլխավորությամբ, հոկտեմբերի 4-ին տեսակոնֆերանսի ձևաչափով մասնակցել են Մոլդովայի դատական փորձաքննությունների ազգային կենտրոնի կողմից կազմակերպված «Դատական փորձաքննության դերը քրեագիտական և դատավարական գործընթացներում» թեմայով միջազգային գիտաժողովին:
Միջոցառմանը մասնակցում էին դատափորձագիտական բնագավառի առաջատար փորձագետներ, գիտնականներ և իրավապահ մարմինների ներկայացուցիչներ Հայաստանից, Իտալիայից, Ռումինիայից, Ուկրաինայից, Լեհաստանից, Հունգարիայից և եվրոպական այլ երկրներից:
Գիտաժողովի բացմանը ողջույնի խոսքով և ելույթով է հանդես եկել նաև Փորձաքննությունների ազգային բյուրոյի տնօրեն, բ.գ.թ. Արգամ Հովսեփյանը:
Կազմակերպության ղեկավարի խոսքով՝ ժամանակակից աշխարհում քրեական և քաղաքացիական դատավարությունում դատական փորձաքննությունների դերը դառնում է ավելի նշանակալի՝ պահանջելով ոչ միայն խորը տեսական գիտելիքներ, այլև գործնական հմտություններ, որի զարգացման հարցում մեծ է միջազգային համագործակցության և բազմակողմ շփումների դերը:
«Դատական փորձաքննությունների բնագավառում հետազոտական հնարավորությունների առաջանցիկ զարգացումը մեծապես աջակցում է օրենքի գերակայության ապահովման և օրինականության հաստատման գործին: Նմանատիպ համաժողովների անցկացումը մասնակիցներին հնարավորություն է տալիս ոչ միայն բարձրաձայնել և քննարկել իրենց աշխատանքային գործունեության ընթացքում ի հայտ եկող խնդիրները, այլև նախանշել դրանց լուծման արդյունավետ ուղիները, իսկ փորձի փոխանակումը և համատեղ շփումները նպաստում են փորձագիտական անձնակազմի գիտելիքների ու հմտությունների կատարելագործմանը»,-իր խոսքում նշել է Բյուրոյի տնօրենը:
Արգամ Հովսեփյանը շնորհակալություն է հայտնել Մոլդովայի դատական փորձաքննության ազգային կենտրոնի տնօրեն Օլգա Կատառագային և Կենտրոնի անձնակազմին՝ ՀՀ ԳԱԱ «Փորձաքննությունների ազգային բյուրո» ՊՈԱԿ-ի հետ ակտիվ փոխգործակցության հարցում ցուցաբերած պատրաստակամության, երկկողմ և բազմակողմ ոլորտային միջազգային կապերի ամրապնդման և ընդլայնման համար:
Համաժողովի ընթացքում ներկայացվել են զեկույցներ քրեական դատավարությունում փորձաքննության ապացուցողական նշանակության, դատավարության ընթացքում փորձագիտական եզրակացությունների կիրառման սահմանների, դատական  փորձաքննության նոր տեսակների ձևավորման, լինգվիստիկական փորձաքննության նշանակության, դատական փորձաքննությունների բնագավառում գրաֆոլոգիայի դերի և այլ արդիական թեմաների վերաբերյալ:
Փորձաքննությունների ազգային բյուրոն կարևորում է մասնակցությունը նմանօրինակ համաժողովներին՝ ի նպաստ միջազգային համագործակցության շրջանակների ընդլայնմանը, մեր երկրում դատափորձագիտական հնարավորությունների արդիականացմանն ու ոլորտի կայուն զարգացման ապահովմանը։

ՀՀ ԳԱԱ «Փորձաքննությունների ազգային բյուրո» ՊՈԱԿ-ի տնօրեն Արգամ Հովսեփյանը և Ուկրաինայի արդարադատության նախարարության պրոֆեսոր Ն.Ս. Բոկարիուսի անվան Խարկովի դատական փորձաքննությունների գիտահետազոտական ինստիտուտի տնօրեն Սերգեյ Տյուլենևը կնքել են հաստատությունների միջև համագործակցության և փոխգործակցության ընդգրկուն հուշագիր: 
Նպատակ ունենալով զարգացնել դատափորձագիտական և գիտատեղեկատվական ոլորտներում արդեն իսկ ձևավորված փոխգործակցային կապերը, կողմերը պայմանավորվել են համագործակցել դատական փորձաքննությունների և քրեաբանության բնագավառների մի շարք ուղղություններով ևս:
Նախանշվել են ոլորտի զարգացման ապահովմանն ուղղված համատեղ գիտահետազոտական աշխատանքների իրականացման, երկու երկրների օրենսդրությունների շրջանակներում պետության շահերի, մարդու իրավունքների և ազատությունների պաշտպանության, բարձր որակավորում ունեցող փորձագետների պատրաստման, ինչպես նաև ոլորտի զարգացմանն ուղղված արդյունավետ փոխգործակցության այլ կարևոր ուղղությունները:
ՀՀ ԳԱԱ «Փորձաքննությունների ազգային բյուրո» ՊՈԱԿ-ը կարևորում է միջազգային գիտագործնական կապերի զարգացումն՝ ի նպաստ մեր երկրի դատափորձագիտական բնագավառի գիտական ներուժի շարունակական զարգացմանն ու կատարելագործմանը։

Փորձաքննությունների ազգային բյուրոյի հիմնադրման 20-ամյակին նվիրված միջազգային գիտաժողովին մասնակցելու նպատակով Հայաստան ժամանած ԱՄՆ արդարադատության դեպարտամենտի միջազգային քրեագիտական հետախուզության ուսուցումների աջակցման ծրագրի ներկայացուցիչ Մարկ Մոգլը հարցազրույց է տվել հայաստանյան առաջատար NEWS.am լրատվական գործակալությանը:
ԱՄՆ գործընկերը խոսել է Բյուրոյի հետ համագործակցության, Կազմակերպության փորձագիտական լաբորատորիաների հնարավորությունների, զարգացման հեռանկարների և այլ կարևոր հարցերի շուրջ:
Ամբողջական հարցազրույցը`  

Հարգելի՛ պարոն Քյարամյան, ՀՀ ԳԱԱ «Փորձաքննությունների ազգային բյուրո» ՊՈԱԿ-ի անձնակազմի և անձամբ իմ անունից սրտանց շնորհավորում եմ Ձեզ և Ձեր գործընկերներին՝ ՀՀ քննչական կոմիտեի կազմավորման 10-ամյա հոբելյանի կապակցությամբ:
Քննչական կոմիտեն անցած տասնամյակի ընթացքում ձևավորել է մասնագիտական բարձր գիտելիքներով օժտված փորձառու անձնակազմ՝ առանձնահատուկ դերակատարում ստանձնելով մինչդատական քրեական վարույթի արդյունավետ կազմակերպման և իրականացման գործում: 
Անցած տարիների ընթացքում Քննչական կոմիտեի անձնակազմն ապացուցել է հայրենիքին անմնացորդ նվիրումով ծառայելու առաքելության բարձր գիտակցումով իրագործման սկզբունքին իր հավատարմությունը՝ պատվախնդրորեն կատարելով օրենքով վերապահված լիազորությունները, արդյունավետորեն հակազդելով հանցավորությանը, շարունակական ջանքեր ներդնելով մեր երկրում օրենքի գերակայության ապահովման և օրինականության հաստատման կարևոր գործում: 
Նշվածն առանձնակի ընդգծվեց հատկապես հայրենիքի նկատմամբ սանձազերծված ագրեսիվ պատերազմների արհավիրքներին դիմակայության, նախաձեռնված իրավական գործընթացների աննախադեպ ծավալի պատշաճ ընթացքի ապահովման համատեքստում։ Հարկ է նաև ընդգծել, որ հանցավորության շարժընթացի, ժամանակակից աշխարհի և տարածաշրջանային մարտահրավերների ու զարգացումների պայմաններում Քննչական կոմիտեի առջև դրվող խնդիրներն արդյունավետ կարող են լուծվել կարողությունների շարունակական զարգացման, աշխատանքների ճիշտ կոորդինացման և առավելագույն կոնսոլիդացման արդյունքում, որի լավագույնս իրագործման առումով Ձեզ և Քննչական կոմիտեի բոլոր գործընկերներին մաղթում եմ անկոտրում կամք և վճռականություն՝ գործունեության հաջորդ շրջափուլերում ևս հայրենիքին ծառայելու պատվաբեր գործի արդյունավետ իրականացման և իրավական պետության կերտման բարդ գործընթացում ծանրակշիռ դերակատարում ունենալու համար: Նշվածի արդյունավետ իրականացմանն օժանդակելու առումով կարևոր է ընդգծել նաև Քննչական կոմիտեի և Փորձաքննությունների ազգային բյուրոյի միջև ձևավորված միջոլորտային արդյունավետ փոխգործակցային հարաբերությունների շարունակական զարգացման և բարձր մակարդակի ապահովման նշանակությունը՝ ընդհանուր գործում առավել առաջադեմ արդյունքների դրսևորման, կարողությունների համատեղմամբ հանցավորության դեմ անզիջում պայքարի մղման նպատակով: 
Կրկին շնորհավորելով հոբելյանական օրվա առթիվ, մաղթում եմ նորանոր ձեռքբերումներ և նվաճումներ, բավարար ուժ և եռանդ՝ Սահմանադրությամբ և օրենքով վերապահված լիազորությունների անշեղ իրականացման համար: 
ՏՆՕՐԵՆ՝ Ա. ՀՈՎՍԵՓՅԱՆ

ՀՀ ԳԱԱ «Փորձաքննությունների ազգային բյուրո» ՊՈԱԿ-ի հիմնադրման 20-ամյակին նվիրված «Դատափորձագիտական գործունեության դերն ու նշանակությունը իրավական համակարգում, արդի խնդիրները, զարգացման միտումներն ու հեռանկարները» խորագրով միջազգային եռօրյա գիտաժողովին մասնակցելու նպատակով Հայաստան ժամանած մեկ տասնյակից ավելի երկրների պատվիրակները «Փորձաքննությունների ազգային բյուրո» ՊՈԱԿ-ի ղեկավարության ուղեկցությամբ սեպտեմբերի 27-ին այցելել են Հայոց ցեղասպանության զոհերի հուշահամալիր Ծիծեռնակաբերդ։
Արտերկրի հեղինակավոր դատափորձագիտական և գիտահետազոտական կառույցների ղեկավարներն ու առաջատար փորձագետները Հայոց ցեղասպանության թանգարան-ինստիտուտում ծանոթացել են ցեղասպանության մասին հավաստող փաստաթղթերին ու նյութերին, մշտական և ժամանակավոր ցուցադրություններին, տեղի ունեցած իրողություններին, ինչպես նաև հուշահամալիրի ստեղծման պատմությանը։
Օտարերկրյա հյուրերն այցի ավարտին գրառումներ են կատարել Հայոց ցեղասպանության թանգարան-ինստիտուտի պատվավոր հյուրերի հուշամատյանում, ինչպես նաև ծաղիկներ խոնարհել Մեծ Եղեռնի անմեղ զոհերի հիշատակը հավերժացնող անմար կրակի մոտ, հարգել Սուրբ նահատակների հիշատակը:

ՀՀ ԳԱԱ «Փորձաքննությունների ազգային բյուրո» ՊՈԱԿ-ի հիմնադրման 20-ամյակին նվիրված «Դատափորձագիտական գործունեության դերն ու նշանակությունը իրավական համակարգում, արդի խնդիրները, զարգացման միտումներն ու հեռանկարները» խորագրով միջազգային գիտագործնական գիտաժողովի երրորդ օրը՝ սեպտեմբերի 27-ին «Փորձաքննությունների ազգային բյուրո» ՊՈԱԿ-ում՝ կլոր սեղան-քննարկումներ և գիտագործնական սեմինարների ձևաչափով: 
Կլոր սեղան-քննարկումների շրջանակներում անդրադարձ է կատարվել դատափորձագիտական գործունեության իրավական և գիտամեթոդական ապահովման ժամանակակից պահանջներին և խնդիրներին, դատական փորձագետների պատրաստման և որակավորման բարձրացման արդի հիմնահարցերին, մասնակից երկրներում գործող կառուցակարգերի, լավագույն փորձի հիման վրա ոլորտի զարգացման արդյունավետ ուղիների վերլուծությանը: Քննարկվել են դատաքիմիական փորձաքննությունների արդի հիմնահարցերը և զարգացման միտումները, ներկայացվել են մասնակից երկրներում դատաքիմիական բնագավառի հետազոտությունների ժամանակակից մեթոդների կիրառման առանձնահատկությունները և առավել հաճախ ի հայտ եկող խնդիրնեը, վերլուծվել լավագույն փորձի հիման վրա դրանց լուծման արդյունավետ ուղիները: 
Ներկայացվել են դատաինժիներատեխնիական փորձաքննությունների արդի խնդիրների և զարգացման միտումները, արհեստական բանականության կիրառմամաբ դատափորձագիտական հնարավորությունների զարգացման հեռանկարները, ինչպես նաև քննարկվել են դատաբժշկական, դատագենետիկական, դատահոգեբուժական և դատահոգեբանական փորձաքննությունների արդի հիմնահարցերը և զարգացման միտումները, մասնակից երկրներում նշված բնագավառների հետազոտությունների ժամանակակից մեթոդների կիրառման առանձնահատկությունները և առավել հաճախ ի հայտ եկող խնդիրները, լավագույն փորձի հիման վրա դրանց լուծման արդյունավետ ուղիները:
Նույն օրը կազմակերպվել են նաև այցելություններ «Փորձաքննությունների ազգային բյուրո» ՊՈԱԿ-ի փորձագիտական ստորաբաժանումների լաբորատորիաներ՝ գործնական բաղադրիչի ցուցադրումով և վարպետության դասընթացների իրականացմամբ:
Գիտաժողովի շրջանակներում պայմանավորվածություններ են ձեռք բերվել արտասահմանյան տարբեր երկրներից մասնակից գործընկերների հետ մի շարք ուղղություններով համատեղ աշխատանքների և գիտագործնական հնարավորությունների հզորացմանն ուղղված ծրագրերի իրականացման համար:

Սեպտեմբերի 26-ին Երևանում շարունակվել են ՀՀ ԳԱԱ «Փորձաքննությունների ազգային բյուրո» ՊՈԱԿ-ի հիմնադրման 20-ամյակին նվիրված «Դատափորձագիտական գործունեության դերն ու նշանակությունը իրավական համակարգում, արդի խնդիրները, զարգացման միտումներն ու հեռանկարները» խորագրով միջազգային գիտագործնական եռօրյա գիտաժողովի աշխատանքները «Իբիս Երևան Կենտրոն» հյուրանոցի կոնֆերանս դահլիճներում և «Փորձաքննությունների ազգային բյուրո» ՊՈԱԿ-ում: 
Աշխատանքներն իրականացվել են հետևալ հինգ սեկցիաներով.
Դատափորձագիտական գործունեության իրավական և գիտամեթոդական ապահովման ժամանակակից պահանջներն ու խնդիրները, դերը պետության և անձանց իրավունքների և շահերի պաշտպանության գործընթացներում
Քրեագիտական փորձաքննությունների արդի խնդիրները և զարգացման միտումները
Դատաքիմիական փորձաքննությունների արդի խնդիրները և զարգացման միտումները
Ինժեներատեխնիկական փորձաքննությունների արդի խնդիրները և զարգացման միտումները
Դատաբժշկական, գենետիկական, կենսաբանական, հոգեբանական և հոգեբուժական փորձաքննությունների արդի խնդիրները և զարգացման հեռանկարները
Մասնավորապես «Դատափորձագիտական գործունեության իրավական և գիտամեթոդական ապահովման ժամանակակից պահանջներն ու խնդիրները, դերը պետության և անձանց իրավունքների և շահերի պաշտպանության գործընթացներում» խորագիրը կրող 1-ին սեկցիայում զեկույցներով հանդես են եկել, ինչպես նաև իրենց երկրների փորձով կիսվել են Հայաստանի, Ռուսաստանի, Բելառուսի, Ուզբեկստանի և Իսրայելի տարբեր փորձագիտական կառույցների ներկայացուցիչներ: 
Զեկույցներով են հանդես եկել Օ.Ե. Կուտաֆինի անվան Մոսկվայի պետական իրավաբանական համալսարանի դատական փորձաքննությունների ամբիոնի պրոֆեսոր, ի.գ.դ., դոցենտ Օ. Դյակոնովան (թեմա՝ « Դատափորձագիտական գործունեության ժամանակակից միտումները»), ՌԴ Իրավունքի և կառավարման Տուլայի պետական համալսարանի Դատական փորձաքննություն և մաքսային գործ ամբիոնի պրոֆեսոր, ի.գ.դ. Տ.Տոլստուխինան (թեմա՝ «Քրեական դատավարությունում հատուկ գիտելիքների կիրառման ժամանակակից խնդիրները»), ՌԴ Օ.Ե. Կուտաֆինի անվան Մոսկվայի պետական իրավաբանական համալսարանի Դատական փորձաքննությունների ամբիոնի վարիչ, ՌԴ գիտության վաստակավոր գործիչ, ՌԴ բարձրագույն մասնագիտական կրթության պատվավոր աշխատող, Ռուսաստանի բնական գիտությունների ակադեմիայի ակադեմիկոս, ի.գ.դ., պրոֆեսոր Ե.Ռոսսինսկայան (թեմա՝ «Դատական թվային վերափոխման պայմաններում փորձագիտության զարգացման ուղղությունները»), ՌԴ Վ.Ֆ. Յակովլևի անվան Ուրալի պետական իրավունքի համալսարանի քրեագիտության ամբիոնի պրոֆեսոր, գիտական հետազոտությունների վարչության գլխավոր գիտաշխատող, ի.գ.դ., դոցենտ Դ. Բախտեևը (թեմա՝ «Փորձագիտական և մինչփորձագիտական գործունեության մեջ ստորագրության նույնականացման ավտոմատացված համակարգերի կիրառման դեպքում ռիսկերը և նշանակությունը՝ անհատների շահերի գիտական և մեթոդական աջակցության դիտանկյունից»), Բելառուսի Գիտությունների ազգային ակադեմիայի բելառուսական մշակույթի, լեզվի և գրականության հետազոտությունների կենտրոնի գիտական կազմակերպության «Յակուբ Կոլասի» անվան լեզվագիտության ինստիտուտի» մասնաճյուղի տնօրեն, բ.գ.թ. Ի.Կոպիլովը (թեմա՝ Յակուբ Կոլասի անվան լեզվաբանության ինստիտուտում (Բելառուսի ԳԱԱ) լեզվաբանական փորձաքննություններ անցկացնելու փորձը։ Դատափորձագիտական գործունեության իրավական աջակցության ժամանակակից պահանջները), Ուզբեկստանի Հանրապետության արդարադատության նախարարության Հ.Սուլեյմանովայի անվան հանրապետական դատական փորձաքննության կենտրոնի դատատնտեսագիտական փորձաքննությունների բաժնի վարիչ Շ.Ուռամզատովը (թեմա՝ Դատատնտեսագիտական փորձաքննությունների նշանակությունը հանցագործությունների բացահայտման գործում), ՌԴ Ն.Գ. Չերնիշևսկու անվան ֆիզիկայի ինստիտուտի քրեագիտական նյութագիտության ուսումնագիտական լաբորատորիայի վարիչ, ֆիզ.-մաթ.գ.թ., դոցենտ Վ.Ֆեդորենկոն, ՌԴ Ն.Գ. Չերնիշևսկու անվան ֆիզիկայի ինստիտուտի հիմնարար բժշկության ֆակուլտետի բժշկական կիբեռնետիկայի ամբիոնի ասիստենտ Կ.Սորոկինան, Իսրայելի ոստիկանության ձգաբանական լաբորատորիայի փորձագետ, փ.գ.դ. Պ.Գիվերցը (թեմա՝ «Հրազենային տեսակների հրապատիչների հետքերի նեյրոնային ցանցերի դասակարգման վերլուծությունը՝ դատափորձագիտական գործունեության գիտական և մեթոդական աջակցության ժամանակակից պահանջների ներքո»), ՀՀ վաստակավոր իրավաբան, ի.գ.դ., պրոֆեսոր Վ.Ենգիբարյանը (թեմա` «Դատական փորձաքննությունների քրեադատավարական հիմնախնդիրները»), ՌԴ Իրավունքի և կառավարման Տուլայի պետական համալսարանի «Դատական փորձաքննություն և մաքսային գործ» ամբիոնի վարիչ, ի.գ.թ., դոցենտ Ա.Սվետլիչնին (թեմա՝ Դատական փորձաքննության ինստիտուտի որոշ տերմինաբանական խնդիրներ), Բելառուսի ԳԱԱ մշակույթի, լեզվի և գրականության հետազոտությունների կենտրոնի «Կոնդրատ Կրապիվայի անվան արվեստագիտության, ազգագրության և բանահյուսության ինստիտուտ»-ի մասնաճյուղի կերպարվեստի և դեկորատիվ արվեստի բաժնի վարիչ, ա.գ.թ. Ի.Սկվորցովան (թեմա՝ «Բելառուսի և Լեհաստանի հայկական տեքստիլ մանուֆաբրիկաների կողմից կունտուշի գոտիներից պատրաստված պատարագի զգեստների փորձագիտական ուսումնասիրությունների փորձից։ Դատական փորձաքննությունների իրականացման ժամանակակից գիտամեթոդական լուծումները»), ՀՀ ԳԱԱ Ֆիզիկական հետազոտությունների ինստիտուտ, ֆիզ.-մաթ.գ.թ. Ե.Կաֆադարյանը (թեմա՝ «Բնական ադամանդների դեղին գունավորման աստիճանի որոշման գործիքային ապահովման ժամանակակից գիտամեթոդական մոտեցումները՝ դրանց արժեքի օբյեկտիվ վերահսկման համար»),ՀՀ ՆԳՆ կրթահամալիրի ուսումնամեթոդական և զարգացման վարչության պետ, ի.գ.թ., դոցենտ, ոստիկանության փոխգնդապետ Ա.Մնացականյանը (թեմա՝ Կիբեռհանցավորության վիկտիմոլոգիական կանխման միջոցները, դերը պետության և անձանց իրավունքների և շահերի պաշտպանության գործընթացներում), ՌԴ Վ.Ֆ. Յակովլևի անվան Ուրալի պետական իրավաբանական համալսարանի «Կրիմ Լիբ» քրեաբանության զարգացմանը նպաստող կենտրոնի կրտսեր գիտաշխատող Ա.Ցվետկովան (թեմա՝ Քրեական գործերով համակարգչատեխնիկական փորձաքննություններ նշանակելու նպատակահարմարության իրավական ապահովման ժամանակակից պահանջները), ՌԴ Գ.Վ.Պլեխանովի անվան ռուսական տնտեսագիտական համալսարանի քաղաքացիաիրավական գիտությունների ամբիոնի դոցենտ, ի.գ.թ. Ս.Ժդանովը (թեմա՝ «Դատական սպեցիոլոգիայի ներածությունը հատուկ գիտելիքների բնագավառում»):
2-րդ սեկցիայում քրեագիտական փորձաքննությունների արդի խնդիրների և զարգացման միտումների վերաբերյալ գիտական զեկույցներ են ներկայացրել Հայաստանի, Ռուսաստանի և Բելառուսի դատափորձագիտական բնագավառի առաջատար փորձագետներն ու հեղինակավոր գիտնականները: 
3-րդ սեկցիան նվիրված էր դատաքիմիական փորձաքննությունների արդի խնդիրներին և զարգացման միտումներին: Այս սեկցիայում ներկայացվել են Հայաստանի, Ռումինիայի, Ռուսաստանի, Բելառուսի, Մոլդովայի և Իսրայելի առաջատար փորձագետների և մասնագետների զեկույցները, որոնք վերաբերում էին այնպիսի արդիական թեմաների, ինչպիսիք են՝ ««Հիբրիդային որոնման» համակարգի կիրառումը՝ NIST MS Search ծրագրային փաթեթի օգտագործմամբ՝ անհայտ կառուցվածքի միացությունների նույնականացման դեպքում», «Արհեստական ինտելեկտի վրա հիմնված լեզվական մոդելների կիրառումը՝ թունաբանական վերլուծության մեջ տեղեկատվության որոնումն օպտիմալացնելու նպատակով», «Նոր հոգեմետ նյութեր, քիմիական և օրենսդրական մարտահրավերները» և այլն:
4-րդ՝ «Ինժեներատեխնիկական փորձաքննությունների արդի խնդիրները և զարգացման միտումները» խորագրով սեկցիային զեկույցներ են ներկայացրել ՀՀ ԳԱԱ «Փորձաքննությունների ազգային բյուրո» ՊՈԱԿ-ի փորձագիտական համապատասխան ստորաբաժանումների ղեկավարներն ու փորձագետները:
Հետաքրքիր և արժեքավոր զեկույցներ են ներկայացվել նաև 5-րդ՝ «Դատաբժշկական, գենետիկական, կենսաբանական, հոգեբանական և հոգեբուժական փորձաքննությունների արդի խնդիրները և զարգացման հեռանկարները» թեմայով սեկցիայի ընթացքում Հայաստանի, Ռուսաստանի, Վրաստանի, Գերմանիայի և Ղազախստանի ներկայացուցիչների կողմից: Զեկույցներն առնչվել են նաև արյան հետքերի քրեագիտական հետազոտության ժամանակակից հնարավորություններին, խնդիրներին և հեռանկարներին, Բրոնխիալ ասթմայի ախտորոշման փորձագիտական խնդիրներին, ռազմաբժշկական փորձաքննության ժամանակ տիպիկ բժշկա-փորձաքննական սխալների վերլուծությանը, Դատաբժշկական թունաբանության խնդիրների լուծման նպատակով օրբիտալ իոնային թակարդի օգտագործման հնարավորությունների կիրառմանը, դատաբժշկական լաբորատորիաներում ԴՆԹ-ի աղտոտման կանխարգելմանը, Thermo Fisher-ի HID տեխնոլոգիաների կիրառմամբ անձի նույնականացման ինտեգրված լուծումներին (HID), դատագենետիկական բնագավառում մեծ վաղեմություն ունեցող ինչպես նաև ԴՆԹ-ի ցածր պարունակությամբ կենսաբանական ծագման օբյեկտների հետազոտությունների իրականացման և արդյունքների գնահատման առանձնահատկություններին, դատահոգեբանական փորձաքննությունների ժամանակակից խնդիրներին ու առանձնահատկություններին և այլ թեմաների:
Բոլոր սեկցիաներում ծավալվել են հետաքրքիր և արդյունավետ քննարկումներ:
 

ԳԱԱ «Փորձաքննությունների ազգային բյուրո» ՊՈԱԿ-ը հիմնադրման 20-ամյակի առթիվ շուրջ երկու տասնյակ շնորհավորական ուղերձներ է ստացել Հայաստանի Հանրապետության և արտասահմանյան երկրների իրավապահ և դատափորձագիտական հեղինակավոր կառույցների ղեկավարների, Հայաստանում օտարերկրյա դիվանագիտական ծառայողների, գիտնականների և այլ գործընկերների կողմից:
Մասնավորապես Կազմակերպության ստեղծման 20 ամյակի առթիվ շնորհավորական ուղերձներ են հղել ՀՀ գիտությունների ազգային ակադեմիայի նախագահ, ակադեմիկոս Աշոտ Սաղյանը, ՀՀ հակակոռուպցիոն կոմիտեի նախագահ Սասուն Խաչատրյանը, ՀՀ քննչական կոմիտեի նախագահի տեղակալ Արթուր Մելիքյանը, ՀՀ փաստաբանների պալատի նախագահ Սիմոն Բաբայանը, Միջազգային և համեմատական իրավունքի հայկական կենտրոնի նախագահ, փաստաբան Սիրանուշ Սահակյանը, Հայաստանի Հանրապետությունում ԱՄՆ դեսպանատան Թմրամիջոցների դեմ պայքարի և իրավապահ համագործակցության գրասենյակի (ԹՊԻՀ) տնօրեն Զաքարի Բարտերը, Դատափորձագիտական ինստիտուտների եվրոպական ցանցի (ENFSI) Խորհրդի նախագահ Ագնեշկա Լուկոմսկան, ԱՄՆ արդարադատության դեպարտամենտի ներկայացուցիչ Մարկ Մոգլը, ԱՄՆ «GTH DNA» ընկերության նախագահ Թիմ Շելբերգը, Ռուսաստանի Դաշնության Ա.Ն.Ֆրումկինի անվան ֆիզիկական քիմիայի և էլեկտրաքիմիայի ինստիտուտի տնօրեն, Ռուսաստանի Գիտությունների ակադեմիայի թղթակից անդամ Ալեքսեյ Բուրյակը, Օ.Ե. Կուտաֆինի անվան Մոսկվայի պետական  իրավաբանական համալսարանի Դատական փորձաքննությունների ամբիոնի վարիչ, Ռուսաստանի բնական գիտությունների ակադեմիայի ակադեմիկոս, պրոֆեսոր Ելենա Ռոսսինսկայան, Մոլդովայի Արդարադատության նախարարության դատական փորձաքննության ազգային կենտրոնի տնօրեն Օլգա Կատառագան, Ռումինիայի Դատական փորձագետների ասոցիացիայի նախագահ, «Տիտու Մայորեսկու» համալսարանի գիտական ղեկավար Գեորգի Պոպան, Հնդկաստանի կառավարության խորհրդական, Հնդկաստանի գերագույն դատարանի գլխավոր իրավաբան Աման Սինհան, Ճապոնիայի Շրջակա միջավայրի կառավարման կենտրոնի տեխնիկական բաժնի ղեկավար Մասաշի Սուգիեն, Ուզբեկստանի Հանրապետության արդարադատության նախարարության Խ.Սուլեյմանովայի անվան դատափորձագիտական հանրապետական կենտրոնի տնօրեն Ակրամ Խալիլովը, Ռուսաստանի պետական արդարադատության համալսարանի ռեկտոր Վլադիմիր Կուլակովը և այլ գործընկերներ:
Փորձաքննությունների ազգային Բյուրոն իր երախտագիտությունն է հայտնում բոլոր գործընկերներին շնորհավորական ուղերձների, գործունեության գնահատման և բարեմաղթանքների համար՝ իր պատրաստակամությունը հայտնելով հետագա արդյունավետ փոխգործակցության ծավալման առումով:

Սեպտեմբերի 25-ին Երևանի Կարեն Դեմիրճյանի անվան մարզահամերգային համալիրում կայացած «Դատափորձագիտական գործունեության դերն ու նշանակությունը իրավական համակարգում, արդի խնդիրները, զարգացման միտումներն ու հեռանկարները» խորագրով միջազգային գիտաժողովի պլենար նիստին ողջույնի խոսքով և ելույթներով հանդես եկան Հայաստանի Հանրապետության, ինչպես նաև արտասահմանյան երկրների իրավապահ և դատափորձագիտական հեղինակավոր կառույցների ղեկավարներ, Հայաստանում օտարերկրյա դիվանագիտական ծառայողներ, գիտնականներ և այլ պատվավոր հյուրեր: Գիտաժողովի առաջին օրը տեղի ունեցած պլենար նիստի շրջանակներում ժամանակակից աշխարհում դատափորձագիտական ոլորտի ներկայիս մարտահրավերների, իրավակարգավորումների, առկա խնդիրների և զարգացման հեռանկարների և այլ կարևոր ասպեկտների վերաբերյալ զեկույցներով հանդես են եկել Հայաստանի, Ռուսաստանի, Շվեյցարիայի, Ռումինիայի, Մոլդովայի և այլ երկրների հեղինակավոր դատափորձագիտական կառույցների և գիտահետազոտական ինստիտուտների ղեկավարներ:
ՀՀ ԳԱԱ «Փորձաքննությունների ազգային բյուրո» ՊՈԱԿ-ի տնօրեն, ՀՀ ԱՆ առողջապահության ազգային ինստիտուտի դատական բժշկության ամբիոնի վարիչ, բ.գ.թ. Արգամ Հովսեփյանի կողմից ներկայացվել է զեկույց՝ «Դատափորձագիտական գործունեության դերն ու նշանակությունը իրավական համակարգում, արդի խնդիրները, զարգացման միտումներն ու հեռանկարները» թեմայով:
ՌԳԱ Ա.Ն. Ֆրումկինի անվան ֆիզիկական քիմիայի և էլեկտրաքիմիայի ինստիտուտի տնօրեն, ք.գ.թ., պրոֆեսոր, ՌԳԱ թղթակից անդամ Ա.Բուրյակն իր զեկույցում անդրադարձել է մոլեկուլի կառուցվածքի պարզման համար կիրառվող մասս- քրոմատոգրաֆիական մեթոդին և դրա ներդրմանը դատաքիմիական փորձաքննությունների բնագավառում: 
Շվեյցարիայի Ձեռագրի գիտական հետազոտությունների ինստիտուտի գիտական գծով տնօրեն, տեխ.գ.դ. Յու.Չեռնովը ներկայացրել է «Իրավական փորձաքննության համար ձեռագրերի համալիր համակարգային վերլուծություն. ԱԲ-ի աջակցությամբ բարելավված ծրագրային հարթակ» թեմայով զեկույց, իսկ Մոլդովայի Արդարադատության նախարարության դատական փորձաքննության ազգային կենտրոնի տնօրեն Օ.Կատառագան՝ «Հնարավոր է արդյո՞ք նույնականացնել կատարողին ձեռագիր տեքստերի և ստորագրությունների պատճեններով» խորագրով զեկույց: 
Ռումինիայի Դատական փորձագետների ասոցիացիայի նախագահ, Տիտու Մայորեսկու անվան համալսարանի գիտական ղեկավար Գ.Պոպան իր զեկույցում ներկայացրել է մատնահետքերի հայտնաբերման և վերականգնման եզակի և նորարարական մեթոդներին վերաբերող ինտեգրատիվ սինթեզի գիտական արդյունքները: 
Ռուսաստանի արդարադատության պետական համալսարանի դատական փորձաքննությունների և քրեագիտության ամբիոնի վարիչ, ի.գ.դ., կ.գ.թ., պրոֆեսոր Տ. Մոիսեևան իր զեկույցում անդրադարձել է դատափորձագիտական գործունեության իրավական կարգավորման խնդիրներին և այլն: 
Գիտաժողովի աշխատանքները հինգ առանձին սեկցիաներով շարունակվել են նաև սեպտեմբերի 26-ին և 27–ին «Իբիս Երևան Կենտրոն» հյուրանոցում և ԳԱԱ «Փորձաքննությունների ազգային բյուրո» ՊՈԱԿ-ում:

• Տնօրենի՝ փորձաքննությունների գծով տեղակալ Արամ Գահնապետյանը
• Տնօրենի՝ գիտության գծով տեղակալ Պատվական Ոսկանյանը
• Տնօրենի՝ ֆինանսական և տնտեսական հարցերի գծով տեղակալ Խաչատուր Աբաջյանը
• Նյութագիտական փորձաքննությունների բաժնի պետ Աննա Թովմասյանը
• Հողագիտական և կենսաբանական փորձաքննությունների բաժնի պետ Աննա Պետրոսյանը
• Էկոլոգիական փորձաքննությունների բաժնի պետ Աշոտ Սանթրոսյանը
• Տնտեսագիտական և հաշվապահական փորձաքննությունների բաժնի պետ Լուսինե Ստեփանյանը
• Շինարարատեխնիկական փորձաքննությունների բաժնի պետ Արթուր Միրաքյանը
• Ճարտարագիտատեխնիկական փորձաքննությունների բաժնի պետ Աշոտ Բադեյանը
• Ապրանքագիտական փորձաքննությունների բաժնի պետ Հովհաննես Գաբրիելյանը
• Ձգաբանական փորձաքննությունների բաժնի պետ Վասպուր Հովհաննիսյանը
• Տեսաձայնագրային, ֆոտոտեխնիկական և դիմանկարային փորձաքննությունների բաժնի պետ Վաղարշակ Քոչարյանը
• Ձեռագրաբանական և հեղինակային փորձաքննությունների բաժնի պետ Մարգարիտա Ալոյանը
• Փաստաթղթաբանական փորձաքննությունների բաժնի պետ Արսեն Բաղդասարյանը
• Ավտոտեխնիկական փորձաքննությունների բաժնի պետ Դավիթ Դալլաքյանը
• Պայթյունատեխնիկական, պայթյունատեխնոլոգիական և հրդեհատեխնիկական փորձաքննությունների բաժնի պետ Դավիթ Մելքումյանը
• Պայթյունատեխնիկական, պայթյունատեխնոլոգիական և հրդեհատեխնիկական փորձաքննությունների բաժնի պայթյունատեխնիկական և պայթյունատեխնոլոգիական փորձաքննությունների բաժանմունքի պետ Ջուլիետա Ղահրամանյանը
• Համակարգչատեխնիկական փորձաքննությունների բաժնի պետ Աշոտ Ադամյանը
• Հոգեբանական փորձաքննությունների բաժնի պետ Ռուբեն Աղուզումցյանը
• Դատաբժշկական փորձաքննությունների բաժնի պետ Կարեն Մխիթարյանը
• Դատաբժշկական փորձաքննությունների բաժնի դատահյուսվածքաբանական փորձաքննությունների բաժանմունքի պետ Հայկազն Չախոյանը
• Դատահոգեբուժական փորձաքննությունների բաժնի պետ Ադելաիդա Գևորգյանը
• Տեղեկատվական ապահովման բաժնի պետ Արուսյակ Մոսիկյանը